Aula Aberta 25 de Novembro

Cartel 8 de marzo Dia Internacional da Muller Traballadora

O 8 de marzo mulleres e homes conmemoramos os esforzos que ao longo da historia as mulleres veñen realizando para acadar a igualdade, a xustiza, a paz e o desenvolvemento.

Esta loita foi liderada dende todos os ámbitos por mulleres, que tomando conciencia da súa situación, actuaron reivindicando unha transformación real das relacións, estruturas e institucións que perpetuaban a súa subordinación. Estas protagonistas da historia son invisibles para a maioría de nós, non se estudan nos centros educativos, non se mencionan nos tratados científicos , seguen sen formar parte do legado sociocultural dun pobo, da súa memoria histórica.

O “Día Internacional da Muller “ representa o recoñecemento dos logros acadados, pero tamén a denuncia pública das situacións que continúan fomentando as desigualdades entre ás mulleres e os homes. É obrigado destacar que neste momento de crise económica global o colectivo que ten máis dificultades para saír da situación de precariedade laboral son as mulleres, as cales viñan historicamente padecendo as consecuencias dunha sociedade androcéntrica. Non nos debemos esquecer de esixir a
toma de conciencia da situación real da muller cando se adopten medidas de calquera tipo para paliar as consecuencias da crise.

Os datos revelan a obrigatoriedade dos poderes públicos de garantir o acceso e a participación equlibrada de mulleres e homes nas diferentes esferas e actividades da nosa sociedade, evitando así que no século XXI teñamos que seguir reivindicando un mercado laboral igualitario, unha educación non sexista, o reparto de responsabilidades no fogar, melloras na conciliación da vida persoal, familiar e laboral, a participación das mulleres nos órganos de toma de decisións e a erradicación total da violencia de xénero.

Un 33,1% das mulleres continúan elixindo traballos a tempo parcial para atender as obrigas familiares fronte ao 3,8% dos homes, a realidade mostra a falla de recoñecemento do traballo doméstico o cal se adquirise o mesmo valor económico que o traballo remunerado aumentaría o produto interior bruto nun 123,6%.

A conmemoración do “Día Internacional da Muller” representa o compromiso responsable e a vontade colectiva de procurar a igualdade de oportunidades entre mulleres e homes, principio do ordenamento xurídico recoñecido constitucionalmente.

Polo tanto, declaramos o noso compromiso de aplicar a transversalidade de xénero en todas e cada unha das nosas actuacións, destacando a importancia da aplicación do Plan Municipal de Igualdade de Oportunidades entre Mulleres e Homes e a consolidación de servizos e organismos que traballan nesta área.